itel A49 ટૂંક સમયમાં ભારતમાં લોન્ચ થશે, 7,000 રૂપિયાથી ઓછામાં મળશે શાનદાર ફીચર્સ

 Itel એ ગયા મહિને જ ભારતમાં તેનો નવો એન્ટ્રી લેવલ સ્માર્ટફોન itel A27 લૉન્ચ કર્યો હતો. itel A27માં 5.45 ઇંચની IPS ડિસ્પ્લે છે. આ સિવાય તેમાં ડ્યુઅલ 4G VoLTE સપોર્ટ આપવામાં આવ્યો છે. ફોનને એન્ડ્રોઇડ 11ના ગો એડિશન સાથે રજૂ કરવામાં આવ્યો છે. હવે કંપની બીજા નવા ફોનની તૈયારી કરી રહી છે. અહેવાલ છે કે કંપનીનો નવો સ્માર્ટફોન itel A49 ટૂંક સમયમાં ભારતીય બજારમાં લોન્ચ થશે.

 Itel એ સોશિયલ મીડિયા પર નવા ફોન વિશે ટીઝર રિલીઝ કરવાનું શરૂ કર્યું છે. અત્યાર સુધી પ્રાપ્ત માહિતી અનુસાર, itel A49માં વોટરડ્રોપ નોચ સાથે મોટી ડિસ્પ્લે મળશે, જોકે ડિસ્પ્લેની સાઈઝ વિશે માહિતી મળી નથી.

itel A49માં સિંગલ રિયર કેમેરા અને સિંગલ ફ્રન્ટ કેમેરા હશે. ફ્રન્ટ અને રિયર બંને પેનલ પર 5 મેગાપિક્સલ કેમેરા હશે. ફોન સાથે ફિંગરપ્રિન્ટ સેન્સર અને ફેસ અનલોક બંને ઉપલબ્ધ હશે. itel A49 એન્ડ્રોઇડ 11 ગો એડિશન સાથે રજૂ કરવામાં આવશે. લીક થયેલા રિપોર્ટ અનુસાર, itel A49માં 2 GB રેમ સાથે 32 GB સ્ટોરેજ મળશે. ફોન સાથે વન ટાઇમ સ્ક્રીન રિપ્લેસમેન્ટની સુવિધા પણ ઉપલબ્ધ હશે.

જણાવી દઈએ કે ગયા મહિને લૉન્ચ થયેલા itel A27ના ફીચર્સ પણ આ ફોન જેવા જ છે. itel A27 ની કિંમત 5,999 રૂપિયા છે. ફોનને એક જ વેરિઅન્ટ એટલે કે 2 જીબી રેમ અને 32 જીબી સ્ટોરેજમાં રજૂ કરવામાં આવ્યો છે. itel A27માં એન્ડ્રોઇડ 11 ગો એડિશન આપવામાં આવ્યું છે. તેમાં 5.45-ઇંચની FW+ IPS ડિસ્પ્લે છે. ફોનમાં 1.4GHz ક્વાડ-કોર પ્રોસેસર છે, જેના મોડલ વિશે કંપનીએ માહિતી આપી નથી.

itel A27માં 2 GB રેમ સાથે 32 GB સ્ટોરેજ મળશે, જેને મેમરી કાર્ડની મદદથી 128 GB સુધી વધારી શકાય છે. કેમેરા વિશે વાત કરીએ તો, itel A27માં 5-મેગાપિક્સલનો AI રિયર કેમેરો છે અને ફ્રન્ટમાં સેલ્ફી માટે 2-મેગાપિક્સલનો કેમેરો આપવામાં આવ્યો છે. ફોનમાં ફેસ અનલોક અને ફિંગરપ્રિન્ટ સેન્સર બંને છે. Itel A27માં 4000mAh બેટરી આપવામાં આવી છે.