ગુજરાતના ખેડૂતોને રખડતા પ્રાણીઓ અને જંગલી પ્રાણીઓથી બચાવવા માટે અમલમાં મુકવામાં આવેલી વાયર ફેન્સીંગ સહાય યોજનામાં મહત્વપૂર્ણ સુધારા કરવામાં આવ્યા છે. કૃષિ, ખેડૂત કલ્યાણ અને સહકાર વિભાગે વર્ષ 2025-26 માટે નવી માર્ગદર્શિકા જારી કરી છે, જેના કારણે સહાય મેળવવા માટેના નિયમોમાં કેટલાક મહત્વપૂર્ણ ફેરફારો અમલમાં આવશે.
નવી જોગવાઈ શું છે?
નવી જોગવાઈ મુજબ, હવે વાયર ફેન્સીંગ યોજના હેઠળ સહાય મેળવવા માટે મહત્તમ 1 હેક્ટર વિસ્તારના ક્લસ્ટરને જ માન્ય ગણવામાં આવશે. અગાઉ, ખેડૂતો 2 હેક્ટર સુધીના વિસ્તાર માટે ક્લસ્ટર બનાવીને સહાય મેળવવાને પાત્ર હતા, પરંતુ તાજેતરના સુધારા બાદ, આ મર્યાદા ઘટાડી દેવામાં આવી છે.
સરકાર દ્વારા જારી કરાયેલ માર્ગદર્શિકા અનુસાર, ખેડૂતોને વાયર ફેન્સીંગ માટે પ્રતિ રનિંગ મીટર રૂ. 300 અથવા કુલ ખર્ચના 40 ટકા, જે ઓછું હોય તે સહાય આપવામાં આવશે. આ નિર્ણયનો ઉદ્દેશ્ય યોજનાના લાભો વધુ ખેડૂતો સુધી પહોંચાડવાનો હોવાનું માનવામાં આવે છે.
મહત્વપૂર્ણ વાત એ છે કે, હવે જૂના વાયર ફેન્સીંગના સમારકામ અથવા જાળવણી માટે કોઈ સહાય આપવામાં આવશે નહીં. આ યોજના હેઠળ, ફક્ત નવા તાર વાડ બનાવવા માટે જ નાણાકીય સહાય મળશે. એટલે કે, ખેડૂતોને ફક્ત નવા વાડ બનાવવા માટે જ સરકારી સહાયનો લાભ મળશે. રાજ્ય સરકાર દ્વારા કરવામાં આવેલા આ સુધારાનો મુખ્ય ઉદ્દેશ્ય રખડતા પ્રાણીઓ અને જંગલી પ્રાણીઓથી રક્ષણ પૂરું પાડવાનો છે જે કૃષિ પાકને નુકસાન પહોંચાડે છે.
